Bobodoran …….

Kulantaran geus lila teu dipariksa ka dokter gigi, nya maksakeun weh ngincid wanci sore mangkukna ka dokter gigi di jl. Bungsu. Saenggeus daftar nya asup kahiji rohangan, kasimpulanana ceuk dokter gigi teh gigi geraham anu be’h kenca kudu dicabut. Ceuk beja, harewos tinu geus pernah dicabut huntu, cenah dicabut huntu teh nyeri kabina-bina, nya akhirna usul ka dokter teh kieu

“dok, dicabut giginya ga sekarang, besok saja ” dokter teh ngajawab “ ya boleh, sesiapnya saja”.

Mangprung balik kalembur, niatan rek neangan batur nu sarua rek dicabut huntu, ceuk pamikir sorangan, lamun isuk dicabut oge, ngalaman nyeri teh moal sorangan lamun aya batur mah.

Satepina di lembur, beberesih, mumuluk terus ngoloyong katukang, maksud rek neangan info anu boga huntu koropok atawa huntu cabuteun, ngaler-ngidul ngawadul di warung tukang, akhirna meunang info yen si abah, tatangga beh kidul cenah huntuna teh geus lila koropok.

“Eta weh sok sering kabejakeun nyeri huntu” ceuk tatangga nu tadina heuay wae mauran anu gutrem.

“Tah ningan aya yeuh pibatureun teh” ceuk sorangan dina hate. Teu dilila-lila, belenyeng ka imahna si abah, nyampak teh si abah keur ngabaheuhay dina dipan awi bari nyuruput cikopi.

”punten bah, damang?”ceuk kuring bari diuk digigireunana. “pangesto jang, kumaha sawalerna?”

”Sae bah, ngan abdi teh bade kumawantun ka abah, aya maksad abdi kadieu teh bah” teu panjang carita teu disumput salindung gonjreng weh satarabasna dicaritakeun ka si abah pimaksudeun teh, teu poho dibibita lamun daek maturan bareng dicabut huntu rek dipangmayarkeun biayana jeung bakal ditraktir jajan batagor simpang. Nya ari kudiolo jajan batagor didayeuh mah teu burung akhirna si abah teh satuju isukan bakal babarengan dicabut huntu.

”tah ningan ayeuna mah ninggang jurang nincak catang”ceuk dina hate ngagerentes.

Pondok carita isukna jam tilu sore ngadingdiut kana motor duaan, muru simpang dago jajan batagor bari ngobrol,satutas jajan diteruskeun ka jl. bungsu.

Sajolna di jl. bungsu terus daftar, diuk bari jempe di tempat tunggu, teu kungsi lila suster nyalukan

“tuan abah, silahkan masuk” si abah ngalieuk ka kuring.”sok bah” ceuk kuring.

”jang, abah mah kudu dibaturan ka jerona , masih sok sieun ningali pakarang dokter teh”

Si abah nyaritana teh bari rada molotot, atuh kuring teh sigap “hayu atuh bah dibaturan kajerona”. Di jero rohangan aya dokter saurang, suster duaan ditambah kuring jeung si abah duaan.

”silakan tuan abah, berbaring di tempat periksa” ceuk suster bari ningali si abah. Si asi abah teh ngalieuk ka kuring

“nangunjar didinya bah” ceuk kuring mertelakeun ka si si abah bari nunjuk kasur pariksa.

Ari geus ngarti mah si abah teh nangunjar, dokter ngadekeutan, terus ngahurungkeun lampu anu aya diluhur kasur.

“Gigi mana yg mau dicabut pak?”ceuk dokter nanya, kuring nembal ti tukang “itu gigi gerahamnya yang sebelah kanan dok”

“coba buka mulutnya”

“calangap bah”ceuk kuring.

kukuring kaciri dokter nyuntikeun jarum, bari ati-ati pisan.

“tunggu sebentar ya pak” ceuk dokter.

“antosan sakedap bah” ceuk kuring pangartikeun.

Kurang leuwih tilu menit dokter ngadeukeutan deui si abah,

“Gimana sekarang sudah kesemutan pak?”ceuk dokter

“Kumaha bah ayeuna tos singsireumeun?” ceuk kuring, si abah unggeuk.

“Nah sekarang coba gigitekan?”ceuk dokter.

Can kaburu kuring ngartikeun, si abah ngunial nangtung, terus ujug-ujug gual geol, gutak gitek di harepeun dokter, suster jeung kuring. Kuring olohok, kitu oge dokter jeung suster.

Kuring sigap, bari rada nyentak “si abah nanaonan?”

“pan tadi ceuk dokter kudu gigitekan cenah” si abah ngalieuk ka kuring bari hariweusweus…..

teu kuat nahan pikaseurieun barakatak weh teu katahan, kitu oge suster jeung dokter.

Sajongjongan mah si abah teh ngahuleng diseungseurikeun teh, kuring langsung sigap

”lain kudu joged gutak-gitek atuh bah, tapi huntuna kudu dipereketkeun, balem bari mereketkeun huntu” ceuk kuring bari nahan pikaseurieun, palaur si abah pundung.

Ari geus ngarti mah si abah teh naek deui nangunjar dina kasur bari balem.

Salila dokter motekar nyabut huntu kuring besem nahan pikaseurieun.

Teu lila rengse nyabut huntu si abah kuring kagiliran, anu tadina disangka nyeri teh, teu karasa nanaon, kabebenjokeun kajadian cikeneh…..

Tuntas mayar jeung nebus obat ngabelenyeng langsung mulang ka lembur. Isukna subuh-subuh bari naheur cai di pipir tukang kuring ngadongeng ka batur-batur polah kajadian harita, na teu disangka-sangka carita teh jadi ear pabeja-beja, si abah cenah joged inul basa dicabut huntu, beu…….

Hampura ah…….

Cag………bobodoran ….




    Tinggalkan Balasan

    Isikan data di bawah atau klik salah satu ikon untuk log in:

    Logo WordPress.com

    You are commenting using your WordPress.com account. Logout / Ubah )

    Gambar Twitter

    You are commenting using your Twitter account. Logout / Ubah )

    Foto Facebook

    You are commenting using your Facebook account. Logout / Ubah )

    Foto Google+

    You are commenting using your Google+ account. Logout / Ubah )

    Connecting to %s



%d blogger menyukai ini: